REDACCIÓN| A Coruña O salón de actos do colexio dos Salesianos acollerá mañá ás 19.30 horas a representación da obra A viaxe de Ana, que será interpretada polo Grupo de Teatro do Oprimido. A peza está baseada en testemuños e experiencias de mulleres sobre a inmigración, de forma que aborda cuestións sobre a interculturalidade, a igualdade de xénero, a diversidade e o fomento dos valores solidarios.

A función terá carácter gratuíto e está aberta a calquera persoa interesada en presenciala. A actividade está organizada pola Fundación Juan Soñador, pertencente aos Salesianos e nada en 2002, aínda que na Coruña opera desde 2009. Entre as súas iniciativas figura o centro de atención a persoas inmigrantes Teranga, situado na praza de María Auxiliadora, e o programa Na Rúa, que actúa no terreo social e educativo con mozos e dispón dun centro en O Ventorrillo.