O constante retorno dos emigrantes galegos está a xerar un novo colectivo que non deixa de crecer en Galicia. É o formado polos fillos dos emigrantes que, aínda que nacidos no estranxeiro, contan con pasaporte e plenos dereitos exercidos xa de xeito presencial coa fixación da súa residencia na comunidade.

A revisión do padrón feita pública onte constata que dito grupo alcanza xa os 103.361 integrantes, formando na súa maioría a segunda xeración dunha emigración que nos anos sesenta e setenta elixiron Centroeuropa como horizonte para tratar de mellorar economicamente.

Xunto a eles, outros 139.880 residentes en Galicia proceden dalgunha outra autonomía española, mentres que 180.012 persoas máis optaron por manter a súa residencia dentro da comunidade, pero nunha provincia distinta á do seu nacemento. O grao de autoctonía da poboación galega sitúase agora nun 87,4%.