Os españois en Bélxica, Francia, Holanda e Suíza elixen aos seus representantes este fin de semana

Os españois no exterior acudirán ás urnas este próximo fin de semana, cando se celebran eleccións aos Consellos de Residentes Españois (CRE) en cada demarcación consular, sempre que se presentou polo menos unha lista. En Europa, é o caso de varios países, por exemplo Bélxica, Francia, Holanda e Suíza.

O tema da reforma electoral, pola que os emigrantes deixaron de participar nas eleccións municipais e autonómicas é o máis comentado estes días previos ás eleccións consulares, xa que todos os representantes políticos no Exterior reclaman a anulación desta normativa. «Estamos a enfrontar tempos ingratos nos que o noso recoñecemento como cidadáns quedou en dúbida tras unha reforma electoral tremendamente limitativa dos nosos dereitos», clama Ángela Sabater, secreataria de Relacións Institucionais do PSOE Europa. O grupo socialista recorda que os Consellos de Residentes son unha canle necesaria para defender os dereitos da diáspora e chama á participación neste proceso electoral.

Creados no ano 1987 polo Goberno de Felipe González, os CRE son órganos consultativos e asesores adscritos ás distintas oficinas consulares. Componse de varios membros da colonia, cuxo número varía en función da poboación española residente na demarcación consular. Os mandatos dos CRE duran catro anos. Ás eleccións preséntanse listas compostas por asociacións.