Avión homenaxea aos seus emigrantes con gastronomía e música mexicana

Por sétimo ano consecutivo o Concello de Avión homenaxea durante o verán aos seus emigrantes, que triplican a poboación do municipio durante o período estival, coa celebración da Festa Mexicana. Desde as 20.00 horas deste venres haberá actividades para os máis pequenos: as típicas piñatas feitas este ano polos maiores do Centro Integral Alvetus, inchables, torito mecánico e outras atraccións.

A partir das 21.00 horas chega a quenda para os máis adultos na praza da Igrexa, onde poderá degustar cociña típica do país azteca, servida por: mesón Mexicano, de Tourón (Ponte Caldelas), O Rincón Azteca, do Carballiño e o Chilam Balam, de Vigo.

Desde o principio ata o final da festa haberá animación musical cos mariachis Festa Rancheira e Garibaldi, con actuacións en vivo e un espectáculos, que segundo fontes do Concello «non deixará indiferente a ninguén».