- A iniciativa, posta en marcha en 2009, obedece á necesidade de facer fronte á evolución crecente da porcentaxe de mulleres inmigrantes, especialmente extracomunitarias, que son vítimas de violencia de xénero.
- Na edición do pasado ano participaron no programa 210 mulleres de 22 nacionalidades, maioritariamente brasileiras, marroquíes e colombianas.
A Secretaría Xeral da Igualdade vai subvencionar este ano cunha contía máxima de 30.000 euros un programa da Asociación de Centros Homologados, ACH, dirixido a mulleres inmigrantes, preferentemente vítimas de violencia de xénero, mediante o desenvolvemento de accións que melloren a súa accesibilidade ao mercado laboral. Este proxecto colaborativo, iniciado en 2009 en resposta á evolución crecente da porcentaxe de mulleres inmigrantes, especialmente extracomunitarias, que son vítimas de violencia de xénero, chega á súa cuarta edición en virtude do convenio asinado a pasada semana entre a Secretaría Xeral da Igualdade e a ACH.
En consecuencia, ACH vai desenvolver no último trimestre deste ano un programa de información e sensibilización para mellorar a empregabilidade deste colectivo de mulleres, mediante unha oferta de accións que abranguen as catro provincias. Os contidos da oferta formativa están orientados a fomentar coñecementos e destrezas na busca activa de emprego, a informar dos fundamentos das políticas sociais relacionadas co emprego e a inmigración, das accións a emprender nos casos de violencia de xénero e a favorecer a cultura asociativa mediante redes de relación entre as mulleres participantes no programa.
A dinámica utilizada consiste na realización de obradoiros itinerantes, unha xornada presencial sobre información e inserción sociolaboral de carácter eminentemente práctico e técnicas de busca de emprego a través da rede. Na edición do pasado ano realizaronse sesións en 13 localidades das catro provincias, nas que participaron un total de 210 mulleres de 22 nacionalidades, maioritariamente brasileiras, marroquíes e colombianas.
ACH é unha entidade sen ánimo de lucro, sensibilizada coa igualdade de xénero, que desenvolve proxectos encamiñados á mellora da empregabilidade nos sectores onde a muller está infrarrepresentada ou nos sectores desfavorecidos de Galicia.