Inmigrantes en Culleredo: «Queremos traballar. Hai moita terra abandonada, que nola arrenden»

(17/10/2012)

«Queremos traballar. Hai moita terra abandonada, que nola arrenden»

Algúns inmigrantes de Culleredo pensan en regresar, pero non teñen fondos para facelo

Localidade:

maría cedrón

Data

En Culleredo, na área metropolitana da Coruña, existe un locutorio onde hai plátanos macho, malanga, ron dominicano, zume de coco... Recorda a un deses típicos bares dos centros galegos no exterior. O que cambia aí é que en lugar de chourizo ou xamón, hai produtos do Caribe. É unha tenda, pero tamén un centro de reunión. Aí ven moitas tardes Sabá Paulino, Marcelo Cruz , José Dionisio, Bernardino Paula e Agustín Biscaíño. Chegaron desde países como República Dominicana e Brasil atraídos polos que dicían que España era un país próspero, un Estado onde había traballo. «Moitos viñeron por familiares, nun primeiro momento cruzaron o Atlántico as esposas porque lles era máis fácil achar traballo e logo viñeron os homes», din. Pero esas promesas de prosperidade quedaron nun soño. Agora están en paro. O colectivo inmigrante é un dos máis afectados pola caída en picado da economía. E co desemprego chegaron os problemas burocráticos cos papeis ou unha diminución de dereitos de acceso á sanidade. Algúns teñen a dobre nacionalidade, pero din que non van votar. Están decepcionados.

O paro

«Todo se volveu en contra». Foron no seu día man de obra para a construción, pero agora non teñen nada. Nin aí, nin na hostalería, nin nos talleres, nin en ningún outro ramo. Son as mulleres as que están a levar algo de diñeiro a casa. «Mandei demandas a moitos lugares, pero nunca contestan. Tampouco queren a ninguén nos talleres para facer prácticas», explica Agustín, que engade que tampouco convalidan títulos. «Son camioneiro e quería facer os cursos para convalidar o carné, pero non tiña diñeiro». Mentres, di Sabá con pena: «Todo está moi mal, todo se volveu contra nós». Están desesperados. Recoñecen que os españois tamén o están pasando mal, pero Sabá apunta que no caso dos inmigrantes cada vez son máis as familias que tocan á porta das asociacións para pedir axuda. Para saír da lameira dá ideas: «Queremos traballar. Aquí hai moito terreo abandonado, que nolo arrienden para cultivalo e producir».

A sanidade

«Denegaron tres veces o permiso». O Goberno galego do PP dixo no seu día que a sanidade pública atenderá aos que non teñen papeis. De feito habilitou un programa para que poidan acceder a ela. De todos os xeitos o feito de que desde Madrid digan que se vai recortar a prestación sanitaria preocupa a un colectivo que, ante a falta de traballo, corre o risco de que non lles renoven os papeis. «Non teño traballo e hai un tempo a miña muller tivo un accidente aquí en Galicia. Danlle unha prestación, pero a cantidade parece que é pequena e esa é a razón pola que parece que me denegaron tres veces o permiso», di Bernardino.

O retorno

«Non hai diñeiro para poder volver a casa». Non descartan volver porque aquí non hai ningunha expectativa, pero o seu problema é que non teñen diñeiro para pagar o billete de regreso. «Non hai diñeiro para poder volver a casa» , explican. Pero o que están a pasar empuxa a iso. Porque, como di José: «Son oficial de primeira e hai máis dun ano que non teño traballo». O problema é que os programas de retorno xa non son como eran antes. «Antes a Cruz Vermella pagaba a pasaxe, pero agora parece que xa nada», di Marcelo.