• Esta iniciativa enmárcase dentro do programa Ne-Nei-Ras, que conta co financiamento da Secretaría Xeral da Igualdade da Xunta de Galicia.

 A Secretaría Xeral da Igualdade financia o proxecto Ne-Nei-Ras que, dende o ano 2010, desenvolve a ONG Mestura para atender de xeito integral as necesidades e problemáticas de mulleres inmigrantes xestantes ou con fillos ou fillas de ata tres anos. Unha das iniciativas máis interesantes deste programa é a aplicación para iPhone e iPad 'Nais do Mundo', destinada a profesionais do mundo sanitario do ámbito da maternidade, para mellorar a comunicación cos seus e as súas pacientes. A presentación desta aplicación ante os medios de comunicación terá lugar mañá, día 30 de xaneiro, no edificio de usos múltiples da Xunta  de Galicia na Coruña (praza de Luis Seoane, s/n) ás 10,30 horas.

Como experiencia piloto, 'Nais do Mundo' céntrase nas claves culturais do colectivo marroquí, ao ser un dos que representan máis diferenzas nos seus costumes arredor da xestación ou o postparto. Ao acto de presentación acudirán a Secretaria Xeral de Igualdade, Susana López Abella; a delegada territorial, Belén do Campo; a coordinadora de Mestura, Silvia Mosuera Mirás; a técnica do Sergas e concelleira de Sanidade e Igualdade no Concello de Culleredo, Rocio Sampedro, e Marcos Saco e Juan Gestal representando á empresa Movendo, desenvolvedora da aplicación.