Arteixo / La Voz  28 de abril de 2013

Todo está listo para que o centro relixioso e cultural Abu Baker poida abrir as súas portas. O Concello de Arteixo informou onte que o colectivo xa presentou por rexistro a comunicación previa de que as obras do inmoble onde se sitúa o centro relixioso na Baiuca realizáronse conforme o proxecto de obra. «Trátase dunha declaración xurada que se presenta agora desde que entrou en vigor a nova normativa das licenzas. Con esta declaración tamén se presentou toda a documentación necesaria para xustificar que as obras se cinguiron ao proxecto que contou co visto e prace do Concello», explicou o goberno local que recoñece que o mero feito de presentar este escrito dálle dereito ao centro a poder iniciar toda a actividade cultural e relixiosa para a que se creou a asociación. «Teñen dereito abrir. Pasará un técnico municipal polo inmoble para comprobar que efectivamente as obras se axustan ao proxecto e se hai algo que emendar, emendarase. Pero a normativa permítelles abrir as portas desde o momento no que presentan a comunicación previa», informou o goberno local.