Feijoo falou onte sobre este asunto, tras o Consello da Xunta, en relación coas xestións que realiza para evitar o peche da axencia consular, «un asunto que lle corresponde ao Estado». Dixo: «É unha cuestión que espero e desexo que o ministro de Asuntos Exteriores teña en conta, dado que hai persoas que necesitan a información e a asistencia do seu ministerio, e se a fórmula é oficina consular ou consulado xeral, xa non me corresponde a min adoptar esa decisión», informa Manuel Cheda, da Redacción de Santiago.

Exteriores asegura que se trata dunha «suspensión de funcións» nunha nota do Consulado Xeral de España do 13 de maio, que corrixía outra dunha semana anterior que falaba de peche. Implica a perda de servizos consulares, laborais e educativos para unhas 10.000 persoas, que deberán desprazarse ata Berna.