Lugo / La Voz  30 de xullo de 2013  

A Deputación de Lugo pedirá ao Goberno central que exima aos emigrantes retornados de declarar as pensións que recibiron no estranxeiro entre os anos 2008 e 2012. Co voto favorable do PSOE e o BNG, e a abstención do PP, o pleno provincial aprobou este mediodía unha proposta na que se insta á Administración central a «anular vos apercibimentos» que recibiron nas últimas semanas miles de emigrantes, e nas que se lles obriga a incluír no IRPF as pensións que cobran dos Estados nos que traballaron, como Suíza ou Alemaña. Segundo o nacionalista Mario Outeiro, a medida obriga aos afectados a devolver entre 10.000 e 15.000 euros. Na súa opinión, os afectados descoñecían a obriga de declarar ese diñeiro. «Non houbo vontade de fraude», sinalou, antes de afirmar que si houbo «descoñecemento». Por esa razón piden ao Goberno central e á Xunta que emprendan unha campaña informativa para que a partir de agora os retornados inclúan no IRPF eses ingresos. A portavoz do PP na Deputación, Elena Candia, cualificou de «absoluta temeridade» o feito de que «unha Administración pública inste a outra administración a que incumpra procedementos sancionadores».