Representante da Plataforma de Emigrantes Retornados da Coruña recollen firmas, esta mañá, na rúa da Gaiteira contra as sancións por non declarar a Facenda a súa segunda pensión, a que perciben do país ao que emigraran. De feito xa están a recibir da Axencia Tributaria española a comunicación de sancións e de intereses de demora con carácter retroactivo. Así, obríganlle a ter que facer a declaración desde o 2008 ao 2013 e pagar a totalidade da cantidade resultante nun prazo de 10 días.
Desde a plataforma reclaman ao Goberno de España que lle facilite a regularización da situación do período 2008-2012, sen recarga nin intereses de demora; a anulación de todos os expedientes sancionadores xa instruídos e a devolución do xa pago; queren que Facenda inicie unha campaña de información a todas as persoas afectadas das súas obrigacións tributarias futuras, E que se revisen os convenios marco con outros países para evitar que situacións deste tipo poidan volver producirse.
Desde a Plataforma de Emigrantes Retornados da Coruña recordan «Que a emigración axudou a levantar a quebra en que se atopaba España, achegando divisas e movendo a economía de aquí». Incluso aseguran que agora, «grazas aos que fomos emigrantes o drama da crise actual é menor nalgúns casos. Son moitos pais e avós emigrantes os que manteñen a fillos e netos que non atopan traballo. E o Goberno de España trátanos como a delincuentes».
Na campaña de recollida de firmas na Gaiteira colabora a asociación veciñal Oza Gaiteira-Os Castros.