Arteixo organiza unhas xornadas para mellorar a atención sanitaria aos inmigrantes

(15/04/2009)

Arteixo organiza unhas xornadas para mellorar a atención sanitaria aos inmigrantes

A diferenza cultural de colectivos como o musulmán é un dos obstáculos

Autor:

La Voz

Data

15/4/2009

Mellorar a atención sanitaria aos colectivos de inmigrantes. Ese é o obxectivo das sétimas xornadas de Sensibilización sobre a Interculturalidade que organiza a oenegué Ecos do Sur coa colaboración do Concello de Arteixo. O encontro, que terá lugar no centro Froxel do municipio mañá e pasado, pretende servir de guión para a atención a unha poboación crecente en Galicia para pór freo aos obstáculos na atención que provocan, por exemplo, as diferenzas culturais con eses grupos de poboación. Entre os relatores están expertos tanto de Galicia como doutras comunidades con maior experiencia no tratamento destes colectivos. As xornadas foron presentadas onte pola alcaldesa de Arteixo, Pilar Souto, a concelleira de Asuntos Sociais, Lourdes Loureiro, unha técnica dese departamento, e o responsable de ecos do Sur, Patxi Furtado.

No caso do concello de Arteixo, por exemplo, un dos principais problemas cos que se atopan os sanitarios son a barreira idiomática ou cultural no caso dos musulmáns ou que moitas persoas non acoden ás citas que teñen estipuladas ou non toman a medicación correspondente.

Pero as xornadas, segundo explicou o responsable de Ecos do Sur, abarcarán asuntos variados. Entre outras cousas, haberá un taller para ver a creación de ferramentas e boas prácticas para a mellora do servizo; un relatorio que falará sobre as lóxicas de exclusión e integración social na atención sanitaria ao colectivo inmigrante ou a realidade galega da inmigración e a saúde nos centros sanitarios públicos. Para falar dese último tema estarán facultativos do Hospital Materno Teresa Herrera , da Coruña.

Mañá tamén se celebrará unha comida intercultural na que poderán probarse pratos típicos de varias partes do planeta. Xa pola tarde tamén se exporá o proxecto de atención que está levando a cabo o Concello de La Solana, en Castela-A Mancha. O municipio foi elixido porque é parecido aos concellos galegos.

O último día tratarán temas como a mediación sociosanitaria e a formación do persoal en asuntos interculturais