Máis do 20% dos novos autónomos son estranxeiros

(29/07/2014)

Máis do 20% dos novos autónomos son estranxeiros

Crece en 13.862 o número de autónomos estranxeiros no primeiro semestre de 2014

Parainmigrantes, xullo 28, 2014.



Segundo o informe publicado pola Federación de Autónomos, ATA, durante o primeiro semestre de 2014, o número de traballadores autónomos estranxeiros dados de alta no Réxime Especial de Traballadores Autónomos (RETA) aumentou en 13.862 emprendedores, o que supón o 21,2% do total de novas altas de autónomos, un 6,2% máis.

Por comunidades autónomas, as Illas Baleares rexistra un crecemento realmente exponencial, cun aumento do 27,1%, superior ao do mesmo período do 2013, no que se rexistrou un aumento do 25,9%.

Murcia, cun aumento do 7,5% e Andalucía, co 6,9% máis, sitúanse por detrás das Illas Baleares en crecemento de autónomos estranxeiros.



Pola contra, as comunidades autónomas con menor crecemento este primeiro semestre foron Galicia, cun aumento do 0,6%, Canarias, 1,5%, Castela a Mancha, co 1,8% máis, e Extremadura, cun aumento do 1,9%.

Por provincias, o informe de ATA mostra como unicamente 3 provincias pecharon o semestre con menos autónomos estranxeiros que cos que o empezou: Ciudad Real, Salamanca e Pontevedra.

As 47 cidades restantes, ademais de Ceuta e Melilla, si rexistraron crecementos en canto ao número de autónomos estranxeiros, sendo, ademais, de I. Baleares, Tarragona (+12,7%), Córdoba (+11,2%), Girona (+10,7%), Granada (+10,1%), Alicante (+8,6%) e Huelva (+8,5%) as que lideraron o devandito aumento ao longo do ano.

Segundo o informe ATA, o colectivo de estranxeiros autónomos representa o 7,6% do total de autónomos inscritos no RETA.

Con respecto á nacionalidade dos autónomos inmigrantes, produciuse un cambio de tendencia. Os últimos anos rexistraban os maiores índices de autónomos entre os cidadáns chineses e romaneses. Agora crecen os emprendedores procedentes de Italia, Marrocos e Bulgaria.

Os cidadáns chineses seguen aumentando, pero a un menor ritmo, aínda que seguen sendo a nacionalidade máis numerosa, seguidos moi de lonxe dos autónomos romaneses e dos británicos.

Por sector de actividade, unicamente o transporte perdeu autónomos estranxeiros, concretamente un descenso do 0,6%, o que se traduce en 47 autónomos menos.

A agricultura, tras descender no primeiro trimestre, volve crecer e son xa 67 autónomos máis que en decembro de 2013 os que se autoempregan no sector agrario, o que porcentualmente representa un crecemento do 2,4% máis.

A construción, pola súa banda, logra consolidar o crecemento de autónomos estranxeiros iniciado no primeiro trimestre e aumenta un 4,5% no primeiro semestre de 2014, o que supón un aumento de 1.155 novos autónomos.

Por detrás da construción e a agricultura, os sectores que máis aumentaron son a hostalaría (+7,1%), actividades administrativas (+6%), actividades profesionais (5,6%) e industria (5,8%).

Aquí podes descargar o informe completo de ATA.