A Deputación de Lugo rende homenaxe á loita das Nais da Praza de Maio e á emigración galega

(21/10/2014)

A Deputación de Lugo rende homenaxe á loita das Nais da Praza de Maio e á emigración galega

Redacción, Lugo | 20 Outubro 2014 - Crónicas da Emigración

José Ramón López Besteiro e Taty Almeida.

O presidente dá Deputación de Lugo, José Ramón Gómez Besteiro, recibiu o pasado xoves a Taty Almeida, integrante da asociación Madres Praza de Maio Liña Fundadora, e a Francisco Lores, presidente da Federación de Asociacións Galegas da República Arxentina. Ambos os dous asinaron no Libro de Ouro da Provincia ao termo dun acto no que tamén estiveron presentes Fabiana Almeida, coordinadora de Dereitos Humanos de Cultura da Nación; Carlos María Duhalte, conselleiro de Dereitos Humanos da Embaixada de Arxentina en España, e Roberto Gudiño, cónsul de Arxentina en Galicia.

No acto, que contou coa presenza dos voceiros dos grupos políticos, Gómez Besteiro subliñou que o esforzo da asociación das Nais Praza Maio Liña Fundadora, que "traballa pola memoria non só dos seus fillos senón de todos os mártires da última ditadura en Arxentina", é "o froito de case toda unha vida de esforzada loita na busca por manter viva a verdade e xustiza a favor dos dereitos humanos". O presidente destacou "a incansable e exemplar traxectoria destas nais heroicas e loitadoras", que levan preto de 40 anos reivindicando "coñecer que aconteceu cos seus fillos, que desapareceron ás mans do aparato do Estado arxentino na época da represión militar,".

Nesta liña, Besteiro transmitiulles o compromiso da institución luguesa en sumarse ao propósito das Nais da Praza de Maio pola recuperación da memoria e a dignidade dos desaparecidos. "Son os vosos fillos, e son os nosos desaparecidos", sentenciou.

Almeida agradeceu a acollida da Deputación, ao tempo que rememorou a historia da loita das Nais de Praza Maio Liña Fundadora, que perseguen xustiza para os preto de 30.000 fillos detidos desaparecidos. Fixo fincapé nas bases da súa loita "pola memoria, pola verdade e pola xustiza. Esiximos xustiza legal", reiterou.

Do mesmo modo, Gómez Besteiro quixo recoñecer o "traballo incondicional" dos emigrantes galegos na Arxentina na figura do presidente da Federación de Asociacións Galegas da República Arxentina, Francisco Lores. Pola súa banda, Lores tamén agradeceu a conmemoración na institución luguesa e remontouse ao tempo no que a Federación acolleu as Nais de Praza de Maio e as apoiou na súa loita. "A dor é de todos, é universal", remarcou Lores, quen definiu as Nais de Praza de Maio como "nais da humanidade". Dende a Federación pediron que a Deputación apoie a candidatura para que as Nais de Praza de Maio Liña Fundadora sexan Premio Nobel da Paz, da dignidade.

Ao termo do acto, o presidente fixo entrega aos asistentes de cinco cestas de produtos autóctonos, como mel de flores, crema e bolachas de castañas, confeituras de froitas, tortas e doces de améndoas, embutidos, ou licores.