O Goberno de Italia converte en delito a inmigración clandestina

(15/05/2009)

O Goberno de Italia converte en delito a inmigración clandestina
A nova lei de seguridade de Berlusconi autoriza as patrullas cidadás
MÓNICA ANDRADE - Roma - 14/05/2009


O Goberno de Silvio Berlusconi aprobou onte no Parlamento, entre as protestas da oposición, novas medidas sobre inmigración, criminalidade e seguridade cidadá que endurecen o polémico proxecto de Lei de Seguridade en torno ao cal a Liga do Norte, socio de Berlusconi, trazou o seu proxecto político. O Goberno someteu as tres emendas a unha cuestión de confianza, o que impediu o debate e a votación secreta.

As emendas recollen vellas aspiracións da Liga do Norte: convértese en delito a inmigración clandestina e amplíase o período actual de detención dos sen papeis nos centros de identificación e expulsión. Este prazo de detención, que en España é de 40 días e ampliarase a dous meses antes de final de ano, en Italia xa acada os dous meses e coa nova lei estenderase ata os seis meses, en liña co máximo permitido pola UE.

Ademais, coa nova lei, se legalizan as rondas cidadás, que colaborarán coa policía denunciando posibles situacións de perigo, e prohíbese realizar calquera xestión administrativa aos inmigrantes sen permiso de residencia.

Esta última medida era un dos grandes atrancos, porque a oposición, a Igrexa e as organizacións humanitarias denunciaron que os fillos dos sen papeis non serán inscritos no rexistro e corren o risco de que se lles declare en estado de abandono e sexan dados en adopción.

O líder da oposición, Dario Franceschini, expresou onte a súa preocupación. "É perigoso que se utilice unha demanda lexítima de seguridade por parte dos cidadáns para volver atrás. Xa houbo un momento na historia italiana na que se expulsaba aos nenos do colexio pola súa relixión. Non podemos volver ás leis raciais", afirmou.

O propio Gianfranco Fini, membro do PDL e presidente da Cámara de Deputados, dixo que o Goberno debe rebaixar o "exceso de propaganda" contra os inmigrantes.

A pesar de que nos últimos días caeron da emenda as normas que obrigaban aos médicos e directores de colexio a denunciar aos clandestinos, a oposición teme que calquera empregado público -enfermeiras, profesores, gardas urbanos...- se vexa constreñido á denuncia. Moitos cren que os inmigrantes non levarán aos seus fillos ao colexio ou ao médico cando enfermen. "Aumentará o número de mulleres que dan a luz fóra dos hospitais e elevaranse os abortos clandestinos", vaticina Marco Impagliazzo, presidente da Comunidade de San Egidio.

O decreto, que mañá será aprobado na súa totalidade polo Parlamento, podería conter normas inconstitucionais, segundo Alessandro Pace, presidente da Asociación Italiana de Constitucionalistas, que sinala que o artigo 2 da Carta Magna "recoñece e garante os dereitos inviolables do home, non só dos cidadáns italianos".

Entre as voces máis críticas onte alzouse a dos bispos. A Conferencia Episcopal Italiana criticou o delito de clandestinidade porque "córrese o risco de crear unha franxa de cidadáns de serie B" e de facer dos inmigrantes unhas "non persoas". Ademais, denunciaron que no decreto non se recolla unha soa palabra dedicada a "a integración dos inmigrantes na sociedade".