Os ministros de Interior da UE non lograron este luns un acordo sobre a repartición de 120.000 refuxiados chegados a Hungría, Grecia e Italia, polo que só se publicará unha declaración da presidencia de quenda luxemburguesa e atrasarase a decisión ao 8 de outubro. O ministro español do Interior, Jorge Fernández Díaz, explicou pouco antes do termo do encontro que había unha serie de países que tiñan problemas co carácter obrigatorio do mecanismo de repartición.
Fuentes comunitarias indicaron que os que se opuxeron foron República Checa, Eslovaquia, Polonia, Hungría e Letonia, e apuntaron a que o anuncio por parte de Francia e Alemaña dun acordo político antes do fin da reunión non axudou a conciliar as posicións dos países.
O ministro de Interior de Luxemburgo, Jean Asselborn, cuxo país ocupa a presidencia de quenda da UE, explicou ao termo do Consello que «ás veces estas reunións acaban con conclusións dos países e outras da Presidencia, e neste caso trátase de conclusións da Presidencia». Asselborn dixo que «aínda que esteamos nunha situación de urxencia hai que seguir os procedementos e consultar ao Parlamento» en referencia ao proceso de aprobación da repartición dos 120.000 refuxiados.
Así mesmo recordou que en paralelo os ministros aprobaron formalmente o seu acordo de xullo para a recolocación de 40.000 persoas nos próximos dous anos, e precisou que a medida poderá entrar en vigor mañá, polo que os traslados de refuxiados poderán empezar rápido, e isto envía «unha mensaxe forte». Tamén explicou que se avanzará cara a unha lista de países de orixe seguros, na que polo momento non estará incluída Turquía, como propuxera a Comisión.
Fernández Díaz descartou que o fracaso desta reunión vaia impulsar a convocatoria dun cume extraordinario de xefes de Estado e de Goberno da UE, e dixo que se volverá á cuestión na reunión do próximo 8 de outubro en Luxemburgo.
«Quedamos sen tempo»
«Os Estados membros fracasaron unha vez máis á hora de tomar decisións difíciles e dar unha resposta compasiva á crise dos refuxiados», sinalou o presidente da comisión responsable para migración e asilo da Eurocámara, Claude Moraes. «Quedamos sen tempo. A reunión do 8 de outubro é a última oportunidade da UE para acordar unha resposta organizada á maior crise de refuxiados desde a II Guerra Mundial en Europa», recalcou o eurodeputado socialdemócrata.
O político británico sostivo que debía ter sido o consello «máis importante» en materia de Interior e Xustiza na historia recente da UE, pero os países mostraron unha actitude «vergoñosa» porque «algúns dos países máis ricos no mundo non poden unirse e axudar a aqueles que foxen da guerra e da persecución en Siria e noutros lugares».
Na súa opinión, a reintroducción de controis fronteirizos temporais por parte de Alemaña e outros países, como Austria, «mostra claramente a necesidade de que os países membros estean unidos e atopen solucións comúns. A reticencia dalgúns Estados membros a mostrar solidariedade en resposta á crise levou a outros a un punto no que han ter que reintroducir temporalmente controis fronteirizos, dixo.
