(22/06/2009)
Emigración comprométese a manter o Centro Galego de Bos AiresXornal.comActualizado 20/06/2009
O secretario xeral de Emigración, Santiago Camba, comprometeuse onte a “colaborar” para “conservar” a que cualificou como “probablemente, a maior institución de galegos no exterior”, o Centro Galego de Bos Aires.
Na súa primeira visita institucional ao país austral trala súa toma de posesión, lembrou que neste centro desempeñou o cargo de delegado da Fundación Galicia Saúde entre 1995 e 1996 e animou aos membros da institución a “traballar con seriedade e esforzo” para, “entre todos, conseguir recuperar todo o esplendor de épocas pasadas”.
“É un centro que levo moi dentro, no que aprendín a ser un pouco máis galego e a sentilo con orgullo”, remarcou Camba, ao tempo que reiterou o “compromiso” da Administración con esta institución “a pesar do contexto de contención do gasto”.
Pola súa banda, o presidente do Centro Galego de Bos Aires, Julio Martínez, deu a benvida a Camba e celebrou o seu nomeamento como “unha posibilidade de continuar profundando nos vínculos de relación entre a Arxentina e Galicia”.
Posteriormente, o titular da carteira de Emigración visitou as instalacións, mantivo un encontro cos membros da Xunta Directiva do Centro Galego e asinou no seu Libro de Honor.
Nos seus tres días de viaxe oficial á Arxentina e Uruguay, desprazarase á Delegación da Xunta, ao Centro Galicia de Bos Aires, á sede da Unión de Asociacións Galegas da Arxentina, ao Hogar Galego para maiores de Domselaar (Bos Aires), ao Centro Galego de Montevideo e á Casa de Galicia da capital uruguaia.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas