Unha homenaxe á emigración

(22/05/2019)

Unha homenaxe á emigración

O concelleiro de Cultura, Víctor Caamaño, presentou onte o espectáculo Un verso, un cantar, de Andrea Pousa e o Bruxo Queiman

Venres, 31 de maio • Auditorio da Xuventude (Cambados) • 20.30 horas • O Concello de Cambados ten pensado despedir o mes das Letras Galegas por todo o alto. O concelleiro de Cultura, Víctor Caamaño, presentou onte o espectáculo Un verso, un cantar, de Andrea Pousa e o Bruxo Queiman. Foi ela quen debullou o contido deste proxecto, que xa está xirando por escenarios de toda Galicia.

O libreto, dixo Andrea Pousa, conta con colaboracións de luxo. Porque moitos dos versos que se recitan durante o espectáculo, ou mesmo que se cantan, levan a firma dalgúns dos grandes autores das nosas letras. Dende Rosalía a Curros Henríquez. Sen esquecer, obviamente, a Ramón Cabanillas. De feito, para a súa visita a Cambados, explicou Queiman, fíxose unha versión adaptada na que as palabras do Poeta da Raza teñen un protagonismo especial.

Coa poesía dos mellores artistas galegos, e cun espectáculo visual e musical, pretenden os responsables de Un verso, un cantar render a súa particular homenaxe «a toda esa xente que nalgún momento tivo que emigrar» para conquistar o seu futuro e, tamén, para axudar a construír o país que tiveron que deixar atrás.

O espectáculo de Queimán e Pousa pechará o mes de maio cultural na vila do albariño.