(16/10/2019)
O PSOE celebrou en Verín un encontro con retornados de Alemaña para tratar diferentes temas fiscais
Redacción, Ourense | 15 Outubro 2019 -Crónicas da Emigración
Un momento do acto sobre fiscalidade organizado polo PSOE en Verín.
Máis de 70 persoas participaron no acto organizado polo PSdeG-PSOE de Ourense en Verín para coñecer a nova fiscalidade para os retornados de Alemaña.
No acto participaron os candidatos ao Congreso, Adolfo Pérez Abellás e Mariña Ortega; o secretario provincial de Emigración, Luís Gulín; o candidato ao Senado, Juan Carlos Francisco; e o secretario de organización do PSdeG-PSOE de Verín, Benigno Rodríguez Rodríguez.
Gulín falou sobre a nova fiscalidade para dous pagadores que en palabras do secretario provincial de emigración “desde o 1 de xaneiro deste ano elévase ata os 14.000 euros para estar exentos de declarar”.
O propio Gulín informou tamén de que “os emigrantes residentes en Alemaña desde o do 1 de xullo están obrigados a informar á axencia tributaria alemá no caso de ter contas bancarias en España e dos movementos dos seus depósitos”. Así mesmo, o responsable de emigración dos socialistas ourensáns detallou de forma exhaustiva o tema do 5% que hai que declarar a Axencia Tributaria Alemá sobre a pensión que se percibe dese país, ademais de explicar os procedementos e experiencias a hora de tramitar as axudas á dependencia alemá e a posibilidade de que o seguro alemán asuma para o coidador as cotizacións ante a seguridade social española e mesmo para a prestación do desemprego.
O candidato ao Senado e secretario de organización do PSdeG-PSOE de Ourense, Juan Carlos Francisco, analizou pormenorizadamente a recente sentenza do Tribunal Superior de Xustiza de Galicia que condena á Axencia Tributaria a recoñecer a un retornado de Alemaña como gastos deducibles os gastos de sanidade e de dependencia que se deducen da súa pensión alemá. “Tal e como constatei en conversacións e informacións solicitadas con colectivos de retornados noutras Comunidades Autónomas como Asturias, Andalucía, Madrid ou Castela a Mancha, neses territorios os retornados de Alemaña non teñen o máis mínimo problema coa súa declaración da renda á hora de reclamar eses gastos deducibles”, explicou Juan Carlos Francisco Rivera.
O senador afirmou tamén que dita situación é “unha manifesta discrepancia de criterios territoriais e de discriminación cara o colectivo galego”. Juan Carlos Francisco tamén se comprometeu a “realizar varias acción ante a Secretaría de Estado de Facenda e solicitar unha reunión co delegado de Facenda en Galicia para abordar esta problemática”.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas