Buenos Aires acolleu unha homenaxe a Castelao con motivo do 70º aniversario da súa morte

(14/01/2020)

Buenos Aires acolleu unha homenaxe a Castelao con motivo do 70º aniversario da súa morte

Redacción, Buenos Aires | 13 Xaneiro 2020 - Crónicas da Emigración

Un momento do acto de homenaxe no 70º aniversario do falecemento de Castelao.

A Federación de Asociacións Galegas da República Arxentina (FAGRA) organizou a homenaxe que se rendeu o pasado sábado, 11 de xaneiro, ao intelectual galeguista Alfonso Daniel Rodríguez Castelao con motivo do 70º aniversario do seu falecemento.

O acto tivo lugar fronte ao busto que o ilustre escritor, debuxante e político galego ten na praza de Buenos Aires que leva o seu nome, situada na intersección que forman a avenida Independencia e a rúa Bernardo de Irigoyen.

A esta xa tradicional cita asistiron autoridades da Federación, músicos da colectividade e integrantes da comunidade galaico-porteña, que participaron da ofrenda floral ao considerado como “pai do nacionalismo galego”, falecido o 7 de xaneiro de 1950 nunha habitación do emblemático hospital do Centro Galego de Buenos Aires.

Non faltaron o son das gaitas, os himnos e as palabras de agradecemento das personalidades presentes para tan insigne figura da cultura galega, que coñeceu de primeira man a emigración e o exilio político, e viu na Arxentina a súa Galicia ideal.