(23/01/2020)
Os retornados confían en que o acordo PSOE-BNG dea resposta ao fin ás súas demandas
Os emigrantes volveron concentrarse onte ás portas do edificio de Facenda, en Vilagarcía
Os emigrantes retornados volveron concentrarse onte en Vilagarcía | gonzalo salgado
Diario de Arousa. f. f. vilagarcía 22/01/20
A Plataforma de Emigrantes Retornados do Salnés volveu concentrarse onte ás portas de Facenda, na rúa Elpidio Villaverde, para reclamar ao goberno de coalición capitaneado polo socialista Pedro Sánchez que dea resposta ás súas demandas. Unhas reivindicacións que levan anos defendendo non só na rúa, senón tamén en diferentes administracións e tamén nos xulgados. De feito o seu principal móbil é que se lles equipare en materia de fiscalización cos xubilados que cotizaron unicamente en España.
Os retornados ven agora unha porta aberta á resposta ás súas reivindicacións no feito de que o BNG asinase un acordo co goberno de coalición para dar solución a esta situación. Agora esperan que o executivo de PSOE e Podemos poidan resolver dunha vez por todas as súas demandas.
Con todo, e ata que o goberno central dea carpetazo definitivo a este asunto, os xubilados non descartan continuar coas medidas de presión para non cesar no seu empeño de ser escoitados.
Cabe lembrar que as súas demandas foron escoitadas en máis dunha ocasión nos plenos municipais dos diferentes concellos a través de mocións nos últimos anos recibindo apoio incontestable.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas