(25/03/2020)
Os emigrantes españois da ‘Viaxe do Retorno’ regresaron este luns a Arxentina desde Xénova
Mariana Ruiz, Buenos Aires | 24 Marzo 2020 - Crónicas da Emigración
O grupo de máis de 900 pasaxeiros, hispano-arxentinos e ítalo-arxentinos, que partiu a bordo do cruceiro Costa Pacífica, o pasado 3 de marzo, regresou este luns a Arxentina en catro voos chárter da empresa Neos.
Tras a negativa dos portos de España, Italia (nun principio) e Francia; finalmente, o domingo pasado recibiron a autorización para descender en Xénova (Italia) e desde alí foron repatriados á Arxentina, en catro voos.
O último avión chegou este luns con 105 pasaxeiros a bordo, que quedaron en corentena en hoteis que dispuxo o Goberno da cidade de Buenos Aires.
Neste último grupo, houbo quen referiu ter ou ter tido síntomas da enfermidade, mesmo algún dixo ter febre, e por iso a decisión de mantelos nunha corentena máis estrita.
Ao resto dos pasaxeiros, mesmo a aqueles que viven en provincias do interior do país, permitíuselles volver aos seus propios domicilios, coa indicación de cumprir alí co illamento social.
O cruceiro de Costa Pacífica partira desde o porto de Buenos Aires, o pasado 3 de marzo, o mesmo día que se rexistraba o primeiro caso de coronavirus na Arxentina. A viaxe, que eles mesmos chamaron ‘Viaxe do Retorno’, contemplaba escalas en Brasil, España, Francia e tiña previsto finalizar o seu percorrido o luns 24 de marzo en Xénova. Con todo, durante a súa traxectoria os casos de coronavirus disparáronse en Europa e os países membros dispuxeron, un a un, o peche dos seus portos.
Tras facer paradas en Río de Janeiro, Salvador de Baía e Maceió, na costa brasileira, a embarcación emprendeu a súa viaxe rumbo ás Illas Canarias, pero o 12 de marzo notificóuselles que non poderían atracar no porto de Santa Cruz de Tenerife. Pasou o mesmo en Italia e en Marsella (Francia), onde só autorizaron a desembarcar ás persoas de nacionalidade gala ou con residencia nese país.
Finalmente, Xénova (unha das zonas máis afectadas polo COVID-19) permitiulles, o domingo pasado, descender desde onde puideron voar á capital arxentina en catro charters.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas