As xestións de Exteriores e a Embaixada de España en Perú facilitaron o regreso de 200 viaxeiros españois

(16/04/2020)

As xestións de Exteriores e a Embaixada de España en Perú facilitaron o regreso de 200 viaxeiros españois

Redacción, Lima | 16 Abril 2020 - Crónicas da Emigración

 
As xestións do Ministerio de Asuntos Exteriores, Unión Europea e Cooperación, da Embaixada de España en Perú e do Consulado español en Lima facilitaron este martes o regreso a España, nun voo especial de Iberia, de máis de 200 viaxeiros españois.

O persoal da Embaixada e do Consulado realizaron o traslado de máis de 200 pasaxeiros (españois, da UE e peruanos residentes) ao Grupo Aéreo Nº 8 para tomar o avión que os conduciu de retorno a España.

Este voo foi o quinto que despegou de Lima grazas ás coordinacións entre os gobernos de España e Perú e os seus respectivos ministerios de Exteriores para obter os permisos especiais que permitiron que poidan levarse a cabo.

O vindeiro sábado, 18 de abril, está programado un novo voo (o sexto), que será o último, seguindo as medidas sanitarias ditadas polas autoridades peruanas. A Embaixada de España publicou un aviso nas súas redes sociais para advertir sobre este último voo: “Cidadáns e cidadás doutros países membros da UE poden viaxar no voo organizado polo Ministerio de Asuntos Exteriores, Unión Europea e Cooperación de España do día 18 de abril, tal e como o fixeron en voos anteriores. A tramitación e inscrición debe facerse obrigatoriamente a través da Embaixada do seu país en Perú. Non se incluirán solicitudes que non se recibiron a través das diferentes Embaixadas de países da UE en Perú”.