As cinco sedes abriron esta semana as súas portas en horario de mañá, de 9 a 14:30 horas, ampliando deste xeito a atención telemática mantida en todo momento.
Santiago de Compostela, 3 de xuño de 2020.
As oficinas de Asesoramento e Seguimento ao Retornado da Secretaría Xeral da Emigración están a retomar a atención presencial logo da suspensión temporal derivada das restricións impostas polo Estado de Alarma en España. O servizo de atención tanto telefónica como a través do correo electrónico seguiu operativo durante estas dez semanas, nas que o persoal técnico encargado de orientar de xeito personalizado aos galegos e galegas que veñen de regresar á comunidade contestaron todas as consultas recibidas.
Así, desde principios desta semana a Oficina Integral de Asesoramento e Seguimento ao Emigrante Retornado volve contar cun servizo de consulta física, que se irá ampliando progresivamente a medida que mellore a situación sociosanitaria de Galicia respecto á pandemia do coronavirus. Polo de agora, a opción presencial ofrécese en todas as súas sedes de 9 a 14:30 horas, horario que irá aumentado paulatinamente. A Coruña, Santiago, Lugo, Ourense e Vigo atenden, deste xeito, a todos aqueles galegos e galegas que retornaran a Galicia para acompañalos en todo o proceso de regreso para facilitarlles a súa integración social e laboral. As persoas interesadas poden acudir a estas oficinas solicitando cita previa a través do teléfono ou do Portal Retorna de GaliciaAberta, a web da Secretaría Xeral da Emigración (emigración.xunta.gal).
Información detallada e adaptada
O titular do departamento autonómico, Antonio Rodríguez Miranda, considera “imprescindible que os retornados conten cun sistema integral de orientación personalizada nestes momento de incerteza social e económica”. Nestas oficinas, os usuarios e usuarias recibirán información detallada sobre as diferentes axudas recollidas na Estratexia Galicia Retorna 2020 actualmente en vigor, e adaptada ao perfil de cada solicitante.