Hana Jalloul inaugura a mostra ‘Reflexións desde o meu balcón: cando o tempo non pasa’

(17/12/2020)

Hana Jalloul inaugura a mostra ‘Reflexións desde o meu balcón: cando o tempo non pasa’


Crónicas da Emigración.

Redacción, Madrid | 15 de decembro de 2020

Hana Jalloul, durante a inauguración da exposición cos testemuños dos maiores de Bélxica, durante o confinamento.

A mostra foi cedida pola Asociación Hispano Belga

Hana Jalloul inaugura a mostra ‘Reflexións desde o meu balcón: cando o tempo non pasa’

Redacción, Madrid

A secretaria de Estado de Migracións, Hana Jalloul, inaugurou este martes a exposición fotográfica ‘Reflexións desde o meu balcón: cando o tempo non pasa’, cedida pola Asociación Hispano Belga de Bruxelas. Esta actividade enmárcase nun conxunto de actos e visitas que o Ministerio de Inclusión, Seguridade Social e Migracións desenvolverá ao longo desta semana con motivo do Día do Migrante.

Esta iniciativa foi impulsada polo espazo senior da Asociación Hispano Belga durante a primeira onda da pandemia Covid-19. Fundada en 1964, esta asociación naceu co obxectivo de recibir, informar, acoller e acompañar aos españois e as súas familias, que naquela época emigraban a Bélxica. Actualmente, ademais da área senior, outros sectores completan o panorama de necesidades coas que se atopan á súa chegada: a escola de deberes, que acompaña aos nenos no seu proceso de integración no sistema educativo belga; o Servizo Social, que asesora en como obter unha documentación, un rexistro comunal, ou resolver calquera problema legal que necesiten resolver; Alfabetización e Francés lingua estranxeira, que axuda aos adultos para formarse e poder conseguir un traballo ou simplemente relacionarse coa súa contorna francófona; Centro de Expresión e Creatividade, que serve de punto de encontro entre persoas de distintas idades e procedencias a través de talleres creativos. Ademais, contan cunha área de educación permanente, que aborda unha serie de programas de formación para a emancipación, autonomía e integración dos emigrantes.

A Asociación Hispano Belga reflexionou durante a pandemia sobre unha actividade que permitise manter o contacto con este grupo de maiores residentes en Bélxica, un colectivo fraxilizado polos problemas de soidade e de saúde.

Co grupo de maiores que aceptou colaborar na realización desta exposición, determinouse aplicar un enfoque baseado na escoita, a exteriorización dos seus temores, das súas vivencias, na soidade do confinamento, nas súas lembranzas e como non, nos seus desexos para o futuro. Ao longo do mes de xuño 2020 os fotógrafos Bertrand Cavalier e Lina Manousogiannaki comezaron as visitas ás casas daquelas persoas que accederon a participar no proxecto. Nos seus fogares, fóronse tomando as fotos e gravando os seus testemuños.

A exposición poderá visitarse de luns a venres de 10 h a 14 horas no Salón de Actos da Secretaría de Estado de Migracións, rúa José Abascal nº 39, Aforo limitado.