A cifra de persoas que foxen da violencia supera por primeira vez os 100 millóns pola guerra en Ucraína

Ginebra - 23 may 2022 -

A guerra de Ucrania e outros conflitos elevaron a cifra global de refuxiados e desprazados por encima dos 100 millóns de persoas, segundo informa este luns a Axencia das Nacións Unidas para os Refuxiados (Acnur). Desde o comezo da ofensiva rusa en Ucraína, 14 millóns de persoas, máis da cuarta parte da poboación nacional, que tiveron que deixar os seus fogares. Máis de seis millóns deles cruzaron as fronteiras cos países veciños, mentres que oito millóns máis se atopan desprazados en territorio ucranio.

“É unha marca que xamais debería terse batido”, sinalou o alto comisionado da ONU para os refuxiados, Filippo Grandi. Este fito, segundo Grandi, “debe ser unha chamada de atención para acabar cos conflitos, as persecucións, e atender as causas que forzan a xente inocente a fuxir dos seus fogares”.

O número de refuxiados e desprazados no mundo a finais de 2021 roldaba os 90 millóns de persoas, xa entón un récord. Acnur, que publicará a súa cifra oficial de desprazados no mundo en 2021 pouco antes do Día Internacional do Refuxiado (o 20 de xuño), lembra outras recentes e graves crises de refuxiados actuais máis aló de Ucraína, como a de Etiopía, Burkina Faso, Myanmar, Nixeria, Afganistán ou a República Democrática do Congo, entre outras.

A axuda humanitaria para este colectivo “é un paliativo, pero non unha cura: a única forma de reverter esta tendencia é a paz e a estabilidade, para que os inocentes non teñan que optar entre correr perigo nas súas casas ou fuxir de forma precaria cara ao exilio”, destacou Grandi.