Alma Barrón, edila de Cultura de Ares, posa cos tres exemplares.

 

Da man dos veciños e co esforzo municipal, o Concello de Ares conseguiu pór en valor a memoria da emigración do municipio a través de tres publicacións, «que supoñen a materialización en texto da liña de traballo que vén a desenvolver o Concello, moi centrada en poñer en valor a historia de Ares».

A terceira e última destas edicións facsímiles, Campaña político social e anticaciquil de Juvenal, presentouse durante a última edición do Ares Indiano. As outras dúas son Como se chega a millonario, de Miguel Bendamio; e Proa ao Mar e á terra, de Agustín Bugallo.

A concelleira de Cultura, Alma Barrón, explica que o arranque desta edición de facsímiles «vencéllase directamente cos propios alicerces do Ares Indiano, entendendo a celebración non só coma unha actividade lúdica, senón tamén coma un evento que axuda a propulsar iniciativas que divulgan e contextualizan o pasado do municipio».

¿Como é posible atopar o material orixinal que serve de base para a publicación dos textos? A edila aresana nomea dous elementos craves: «A involucración da veciñanza é fundamental. Son eles os que achegan as obras orixinais, prestándose a que as tratemos, tamén porque co tempo poden ver que hai un traballo de recuperación sólido e importante dende o Concello feito con moito cariño». Tamén, destaca Barrón, o labor coordinado co Consello da Cultura Galega para a edición do primeiro dos facsímiles.

O primeiro manuscrito orixinal, Como se chega a ser millonario, chegou á institución local a través do veciño Agustín Suárez, e os seguintes grazas a Jesús Vilasánchez, pertencente a unha familia con antepasados indianos. «Aínda que foi complicado ao comezo, nós sempre consideramos que poder acceder a este tipo de obras é moi necesario; que estean nos arquivos públicos para todas as persoas que desexen consultalas», detallou Barrón.

As publicacións parten de relatos distintos tanto en temática como en xénero. Como se chega a millonario, a primeira das tres obras recuperadas «trátase dunha obra de ficción que afonda no proceso de mellora económica dos emigrantes con máis éxito, mais tamén na importancia de lembrar as orixes e axudar á prosperidade de Ares». Da ficción pásase á autobiografía na segunda obra, Proa ao Mar e á Terra, «coa experiencia persoal do indiano Agustín Bugallo en Cuba e o seu regreso á vila»,

Campaña político-social e anticaciquil de Juvenal, unha non ficción xornalística «que amosa a conciencia política e social, anticaciquil, do primeiro terzo do século XX».