O novo bum venezolano dispara as peticións de asilo a cifras históricas

(11/10/2022)

O novo bum venezolano dispara as peticións de asilo a cifras históricas




A Feira da Chinita en 2019, organizada polos venezolanos no Campo da Feira. ÓSCAR PINAL


A Rexión Internacional 10/10/2022

Brasil Iglesias - Jorge Pereira - A Rexión


As peticións de asilo dispáranse na provincia de Ourense, empuxada polo bum de venezolanos que chegan á provincia, tras o parón da pandemia, e piden protección internacional para poder quedar. En só nove meses de 2022 (de xaneiro a setembro), o Ministerio do Interior recibiu xa 686 solicitudes de protección internacional (tamén chamada solicitude de asilo), unha media de tres ao día, fronte ás 306 rexistradas en todo o 2021, é dicir, disparáronse as peticións un 124% respecto ao ano pasado e aínda quedan tres meses para acabar 2022.

Este subidón atribúese á alza na chegada de venezolanos, que se está reproducindo en toda España e que en Ourense ten un efecto moi importante polos fortes vínculos da provincia co país caribeño, froito da emigración pasada. De feito, a comunidade venezolana é xa, con diferenza, a máis grande de todos os estranxeiros que residen na provincia.

Só de xaneiro a setembro, este 2022 pulverizou todos os récords de peticións de asilo, superando tamén a 2020 (520 peticións), ata o de agora o ano con maior bum de solicitantes. A pesar de que poida parecelo, tras este pico de solicitudes de asilo non se atopa a guerra de Ucraína, pois os refuxiados ucraínos que chegaron á provincia non computan nesta estatística, senón que son solicitudes de protección temporal, das que Interior xa resolveu 387 en territorio ourensán, que se engadirían a esas 686 solicitudes de asilo doutras procedencias.

Ourense é a novena provincia española con máis solicitudes de asilo en proporción á súa poboación, con 225 por cada 100.000 habitantes, só superada por Melilla, Ceuta, Madrid, Tenerife, Segovia, Huesca, Soria e Áraba. O 39% das solicitudes de asilo acapáranas os venezolanos, seguidos do 25% correspondente a persoas procedentes de Colombia.

Desde o servizo de orientación laboral da Fundación Amigos de Galicia, alertan de que o mes de setembro observaron “unha chegada desbordante de persoas sen papeis procedentes de Venezuela reclamando axudas sociais, todas elas sen permiso de traballo nin estudos homologados”. Consideran esta inmigración masiva “moi preocupante”, pois “as opcións de conseguir emprego legal son imposibles”. Só nese último mes rexistráronse 52 novas peticións de asilo político na provincia.

UNHA VÍA DE REGULACIÓN

O presidente da asociación de venezolanos Alma Llanera, Lorenzo González, matiza que non se trata de migrantes que entren a España de maneira ilegal, senón que “veñen co posto” e a súa carencia de documentos regrados e ratificados débese á situación de “estado errado” do país de orixe: “A burocracia é moi lenta e ás veces é preciso pagar por baixo da mesa, e a situación é desesperante, polo que non hai tempo de facer trámites”.

González apunta ao descoñecemento, por parte dos inmigrantes venezolanos, da consideración que o Goberno de España ten da situación de Venezuela: “Moitos cidadáns do montón fan unha solicitude de asilo político e acaban por rexeitarlla porque non son activistas, funcionarios ou militares opostos ao réxime”.

A efectos prácticos, a solicitude o asilo facilita a regulación: unha vez se  rexistra a petición, o solicitante ten dereito a permanecer no país ata a resolución do trámite por parte das autoridades, que teñen un prazo máximo de seis meses que, normalmente, demórase ata dous anos. Neste lapso e tras medio ano de realizar a solicitude, o interesado recibe un permiso de traballo que pode renovar mentres non se lle concede ou denega o asilo.

A este especto, o avogado Anthony Rojas, especializado en asesorar sobre estes procesos burocráticos, indica que o fenómeno podería ir a menos se o Sistema Nacional de Acollida de Protección Internacional acelera o trámite destas solicitudes en base ao novo regulamento aprobado no Real Decreto 220/2022, do 29 de marzo.

Ademais, sinala que “a Oficina de Estranxeiría empeza a mirar con lupa as razóns que presentan os solicitantes”, polo que isto desanimaría a moitos de solictar sen ter probas documentais.