(12/10/2022)
Ucraínos xeran ducias de empregos en Galicia ao instalarse co seu portal de comercio electrónico en Cariño
As noticias sobre a guerra de Ucraína, hoxe é o segundo día seguido de ataques con mísiles rusos sobre cidades, vívense con especial angustia nun dos lugares máis remotos de Galicia e de España, Cariño. Alí, preto de Cabo Ortegal, están instalados un cento de ucraínos, na súa gran maioría traballadores dunha empresa da internet, AVTOPRO, e as súas familias. Galiciapress conversou con Olga Strelnyk, a súa responsable de recursos humanos e desenvolvemento de negocio.
Manuel Vilas López
Galiciapress| martes, 11 de outubro de 2022
Parte da comunidade de Ucraína no Club do Mar de Cariño
Despois de medio ano en Cariño, os emigrantes xa tiveron oportunidade de aclimatarse á idiosincrasia de vivir nunha pequena e remota vila mariñeira de Galicia. Merecémonos os galegos a nosa fama de reservados?
"Só vimos cousas boas dos galegos e os cariñenses, nin nos nosos mellores soños podiamos imaxinar a benevolencia e o amor que recibimos"
"Só vimos cousas boas dos galegos e os cariñenses. As nosas expectativas non eran demasiado altas, porque aceptamos o feito de que a confianza debe gañarse sempre e en todas partes, pero nin nos nosos mellores soños podiamos imaxinar a benevolencia e o amor que recibimos", responde Olga.
Iso si, a traballadora recoñece que tan calorosa acollida pode estar influenciada pola súa condición de desprazados porque "nunha situación normal, se só viñésemos doutro país para facer negocios, todo, por suposto, sería diferente".
A pesar dos intentos do Kremlin para que os europeos retiren o seu apoio a Ucraína debido ao impacto da guerra nas súas vidas pola alza de prezos, Strelnyk non notou que a calorosa acollida arrefriouse a medida que pasan os meses. A súa avaliación xeral por agora é que "os galegos son xente amable e estamos moi contentos de estar aquí".
REGUGIADOS SI, EMPRESARIOS E TRABALLADORES TAMÉN
É máis, destaca que co paso do tempo as autoridades fóronlles facilitando máis e máis a vida, polo menos no burocrático xa que "puidemos completar documentos, obter o dereito para traballar, alugar unha casa e oficina, abrir contas bancarias, permanecer no país por máis de 90 días, etc. Antes disto, todo isto era moi difícil e inaccesible para a maioría e sen isto é imposible integrar o negocio".
Iso, o "negocio", é clave para entender o que está a pasar en Cariño, xa que o seu centenar de novos habitantes non son os típicos refuxiados. Son refuxiados no sentido de que fuxiron dunha guerra pero á vez son traballadores inmigrantes, coa peculiaridade que non traballan por conta allea para españois, emigraron a Galicia co seu propio negocio ao lombo.
Cunha década de experiencia, AVTOPRO é unha das plataformas líderes en Europa no comercio B2B de recambios de coches. É dicir, poñen en contacto a provedores - como fabricantes ou despezamentos - con consumidores, principalmente talleres de reparación de vehículos, aínda que tamén os particulares poden comprar pezas. Aseguran dispoñer dun catálogo de 23 millóns de compoñentes e uns 500 provedores certificados.
Un modelo de negocio que, vista a alta gama dalgúns dos vehículos con matrícula ucraína que circulan por Cariño, funciona. Ademais, ser intermediarios virtuais permitiulles trasladarse desde as tranquilas augas de Odessa, ás beiras do Mar Negro, ata o ventoso Ortegal, onde o Atlántico abraza o Cantábrico.
Por que elixiron Cariño? En parte por casualidade. Olga estaba en Cariño por unha viaxe de negocios cando estalou o conflito. Decidiu que alí era un bo lugar para criar aos seus fillos e ao final uns 80 traballadores instaláronse na vila.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas