Ucraínos en Pontevedra: "Nunca é doado adaptarse a que te boten do teu propio país"

(24/10/2022)

Ucraínos en Pontevedra: "Nunca é doado adaptarse a que te boten do teu propio país"

Problemas para atopar un alugueiro, o idioma, ou o shock cultural provocan que moitos refuxiados non se integren totalmente

photo_camera Reencontro de familias de refuxiados á súa chegada. JAVIER CERVERA-MERCADILLO


Noelia Paz
Diario de Pontevedra 22/oct./22

Desde que o pasado mes de marzo chegasen as primeiras familias ucraínas aos centros de acollida pasaron sete meses nos que cambiaron moitas cousas. Segundo explican asociacións como Aga (Asociación Galega de Axuda a Ucraína) ou Galiaxuda ou o Colexio SEI San Narciso de Marín, cuxas instalacións colleron en marzo a máis de 50 ucraínos, variou o número de persoas aloxadas así como a súa adaptación.

No que respecta a a adaptación das familias, os centros coinciden en que é positiva, pero segue habendo algúns hándicaps como o idioma ou os problemas para conseguir un alugueiro.

No caso da asociación Galiaxuda, das 18 persoas ás que deron acollida agora só quedan cinco divididas en dúas familias. "Moitas persoas decidiron volver ao seu país", explica a portavoz. O idioma, o choque cultural e os diferentes ritmos de traballo escóndense detrás desa decisión. "Nós non adoptamos nin raptamos a ninguén. Eles son libres de tomar a decisión que queiran e é complicado. Nunca é doado adaptarse a que te boten do teu propio país".

Moi de acordo con este punto está Aga. Dentro da súa directiva, Nagore Bermúdez é a encargada do programa de acollida. No seu balance tamén destaca que das 400 persoas acollidas pola asociación, 70 regresaron a Ucraína. O resto ou ben continúan coas súas familias de acollida ou tentaron independizarse de forma positiva. Con todo, tamén neste caso, o idioma segue sendo un dos problemas que condiciona a súa permanencia aquí. "As persoas refuxiadas son fundamentalmente mulleres que están moi cualificadas, pero como non saben moito español teñen que recorrer a postos precarios. Iso, á súa vez, dificulta que poidan ter un alugueiro", explica Nagore Bermúdez.

Son os nenos os que mellor se adaptaron á vida en Galicia. Moitos deles gozan da súa escolarización nos centros galegos. Segundo indica o director do Colexio SEI San Narciso de Marín, Antonio Traba, dos 51 ucraínos repartidos en 16 familias que aloxaron no centro, na actualidade seguen 24 repartidos en sete familias. Deles, un total de 11 son nenos e escolarizáronse. A maiores, outros 11 nenos foron acollidos en Marín, dos que permanecen no centro tres deles. "A adaptación é correcta, teñen vida independente e o traballo é puntual e sen continuidade", destaca Traba.