O colectivo venezolano do Barco triplícase en 10 anos

(18/11/2022)

O colectivo venezolano do Barco triplícase en 10 anos




Foto da recente celebración da festa de "A chinita" dos venezolanos de Ourense


A Rexión Internacional 17/11/2022

José María Cruz - A Rexión

A presenza de inmigrantes de nacionalidade venezolana no padrón do Barco aumentou considerablemente nos últimos anos. No Concello barquense constatan un repunte deste colectivo, que a data de onte alcanzaba as 108 persoas empadroadas. En 2012, este dato quedou en só 28, ou o que é o mesmo, na última década o seu número case se cuadriplicou, crecendo un 285 %.

Este aumento supuxo pasar de ser a oitava nacionalidade en número de habitantes rexistrados no Barco (por detrás da española, portuguesa, brasileira, colombiana, marroquí, dominicana e romanesa) a situarse no quinto lugar, por detrás da española, portuguesa, marroquí e colombiana. Esta situación dáse nunha provincia como a ourensá, que posúe a maior proporción de poboación venezolana de toda España.

Un sector importante do colectivo venezolano abandona o seu país ante as numerosas carencias de servizos que padece. Así o estima o director de Cáritas Interparroquial do Barco, Julio Mourelo Fulgueral, quen apunta que a moitos destes inmigrantes “non lles gusta a situación do seu país”. En non poucas ocasións, esta circunstancia tradúcese nunhas solicitudes de asilo político que moitas veces non son atendidas, deixando indocumentados aos peticionarios.

Efecto chamada

O “efecto chamada” ten moito que ver coa chegada de novos inmigrantes. Apuntouno Julio Mourelo, quen explica que os recentemente chegados adoitan ter familiares, amigos ou coñecidos na comarca, e por iso é polo que se inclinan por elixir O Barco como lugar de residencia.

A precariedade dos medios para saír adiante cos que chegan leva a un bo número destes inmigrantes a recorrer a Cáritas, de tal forma que no que vai de ano foron 15 as familias que solicitaron a axuda da ONG diocesana, sendo 49 as persoas que se beneficiaron dela, só por detrás das de nacionalidade española, colombiana e marroquí.

O número de venezolanos que teñen a súa residencia na vila barquense vai en aumento. “Está a producirse un repunte de chegados de Venezuela”, apuntaron no Concello, coincidindo desta maneira con Julio Mourelo, quen resaltou que nas últimas semanas “está a chegar xente nova”.

DOUS EMPADROADOS MENOS DESDE XANEIRO

A poboación de nacionalidade estranxeira mantén practicamente conxelado o padrón do Barco. Tal é así, que os datos de xaneiro e os de onte reflicten unha mínima diferenza de 2 habitantes. Segundo indican, a poboación pasou de 13.415 a 13.413 neste período. A diferenza é moito maior ao botar man dos números correspondentes a 2012, cando alcanzaba as 14.095 persoas.

Na actualidade, a falta de que o padrón definitivo fose aprobado, a nacionalidade española está representada por 11.943 rexistrados. Por detrás están os inmigrantes chegados desde Portugal (460), aos que seguen os colombianos (170) e marroquís (146). A continuación aparecen os 108 rexistros do colectivo venezolano, tras superar aos empadroados de Brasil (79), Romanía (75) e República Dominicana (52). Moi por detrás están os procedentes de Honduras (44), Paraguai (36), Siria (30), Paquistán (29), Cuba (24) ou Xeorxia (22), así ata completar unha lista formada por 51 países.

O resumo de nacionalidades que manexa Cáritas encabézano os españois (133), seguidos polos colombianos (77), marroquís (76) e venezolanos (49). Na relación da ONG diocesana aparecen reflectidas 186 familias e 479 destinatarios das axudas.