(19/11/2022)
18 novs 2022 .
A poboación de Galicia incrementouse en 1.995 persoas durante a primeira metade do ano debido ao saldo migratorio exterior e interior, xa que o vexetativo foi unha vez máis negativo (houbo máis mortes que nacementos).
Segundo os datos feitos públicos este venres polo INE, a 1 de xullo deste ano o total de habitantes da comunidade galega sitúase en 2.693.451 . Son 1.995 persoas máis que a 1 de xaneiro, e 2.722 máis que hai un ano.
O aumento débese á inmigración. Así, no primeiro semestre do ano chegaron a Galicia desde o estranxeiro 12.106 persoas máis das que se foron. Tamén foi positivo o saldo migratorio interior, é dicir, o que se dá entre distintas comunidades autónomas. A galega recibiu 622 persoas máis das que saíron cara a outras autonomías. En total, a inmigración achegou a Galicia 12.728 habitantes en seis meses, compensando o saldo vexetativo negativo, xa que no mesmo período houbo 10.651 falecementos máis que nacementos.
Datos nacionais
No conxunto estatal, a poboación de España aumentou en 182.141 persoas durante a primeira metade do ano e situouse en 47.615.034 habitantes.
Durante o primeiro semestre do 2022 a poboación creceu en 14 comunidades autónomas e reduciuse noutras tres, así como nas cidades autónomas de Ceuta e Melilla.
Os maiores incrementos en termos relativos déronse en Comunidade de Madrid (0,82%), Illas Baleares (0,68%) e Comunitat Valenciana (0,66%).No outro extremo, os descensos de poboación máis acusados déronse en Estremadura (-0,15%), Principado de Asturias (-0,08%) e Castela e León (-0,03%).
Todas as comunidades presentaron saldo migratorio positivo co estranxeiro na primeira metade de 2022. Os maiores déronse en Comunidade de Madrid (54.328), Cataluña (40.823) e Comunitat Valenciana (39.494). Pola contra, as comunidades con menores saldos migratorios foron A Rioxa (1.490), Estremadura (2.222) e Cantabria (2.809).
Os saldos migratorios interiores, os que se producen entre comunidades, máis positivos durante o primeiro semestre de 2022 déronse en Comunitat Valenciana (2.570), Comunidade de Madrid (1.435) e Andalucía (769). Pola contra, Cataluña (-1.468), País Vasco (-1.209) e Estremadura (-757) presentaron os saldos máis negativos, con máis habitantes abandonando estas autonomías que chegando.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas