A Asociación Benéfico Cultural do Partido de Corcubión en Buenos Aires, o máis importante símbolo da emigración da Costa da Morte, celebra este 2022 o seu centenario de traxectoria. Unha efeméride que trouxo a unha importante representación da entidade este pasado verán á Costa da Morte, e que alén do océano conmemorouse este pasado domingo cun «xantar de camaradería» ao que acudiron 550 persoas. Carlos Óscar Ameijeiras, presidente, reporta un salón «desbordante de entusiasmo e emoción». Arrincou, como adoita ser habitual nos actos institucionais, cos himnos arxentino e español, interpretados pola orquestra Os Gavilanes de España, e o galego, a cargo do conxunto Alborada.

Ameijeiras recomendou achegarse á rica e extensa historia da asociación a través da participación de Xosé María Rei Lema en Radio ABC —canle de Youtube Corcubión RTV—, onde foi repasando, nas emisións 82 e 73, os acontecementos máis importantes década a década. Carlos Óscar foi prolijo en agradecementos: fundadores, presidentes como o vimiancés Perfecto López, equipo de traballo, grupo Alborada, familia... Agradeceu, tamén, aos alcaldes da Costa da Morte que tan boa recepción lles brindaron en xullo. Lamentando que ningún deles puidese visitalos no país austral, agradeceron os saúdos en formato vídeo.

Interviñeron así mesmo o representante da comuna de Vicente López, e o delegado da Xunta en Buenos Aires, Alejandro López. As palabras deron paso a un «menú bien criollo» e á música e galega e folclore arxentino a cargo de Alborada . Entrada a noite, aplaudiron a actuación de Xabier Díaz, quen en formato trío «deleitou coa súa arte incomparable». «Fin dunha xornada inesquecible para toda a xente que concorreu a agasallar a tan querida casa galega nos seus primeiros cen anos de vida», resume Ameijeiras.

Unha placa para recoñecer o traballo da entidade ao carón e outro do océano

Tanto só unhas xornadas antes desta multitudinaria celebración, o día 8, a Lexislatura da cidade autónoma de Buenos Aires homenaxeou tamén á entidade ABC polo seu centenario. Resultado diso, descubriuse unha placa conmemorativa na entrada da sede social de ABC, na rúa Venezuela da capital arxentina. Foron, neste caso, un centenar de persoas as presentes, con destacados mandatarios, recolleron os medios locais.

Cecilia Ferrero, lexisladora porteña, impulsou este recoñecemento, e tivo ademais gran respaldo. Vén coincidir cun tempo de «apoxeo» para ABC, «xa que ademais de contar cun espectacular recreo no partido de Vicente López, que conta con modernas instalacións deportivas, actualmente tamén está encarando a reforma das instalacións do primeiro piso da súa sede social na rúa Venezuela co obxectivo de aumentar o espazo dispoñible para poder brindar máis servizos aos seus socios», recolleu España Exterior.

En certa medida, con discursos, emoción e música, resultou unha especie de preinauguración . Durante este encontro definiuse á entidade recoñecida como «histórica e importante institución galega na nosa cidade», exemplo de traballo, na primeira metade do século XX, en prol dos centos de miles de emigrantes que chegan ao porto de Buenos Aires buscando unha vida mellor. Non só iso, senón que na terra de orixe, Galicia, procuraron unha rede de escolas.