A comezos de ano a Secretaría Xeral de Emigración abrirá unha nova convocatoria destas axudas, que permiten a titulados galegos residentes no estranxeiro contar con apoio económico para realizar un máster en Galicia. A Xunta anima a preparar a documentación necesaria para acceder a esta liña de apoio

20 novs 2022 .

Unha nova ferramenta dixital facilitará aos galegos universitarios do exterior toda a información sobre a documentación que se necesita para optar ás bolsas BEME Máster (Bolsas de Excelencia Mocidade Exterior), promovidas pola Secretaría Xeral de Emigración da Xunta. Trátase dunha campaña de promoción que se pode consultar na web deste departamento da Administración autonómica a través desta ligazón, onde os interesados, ademais de obter información, poden solicitar o asesoramento que necesiten.

A Xunta anima aos galegos do exterior que estean a cursar estudos universitarios a que comecen a preparar a documentación necesaria para poder acceder á nova convocatoria, a sétima xa, que se abrirá a partir do mes de febreiro. «Estamos a traballar para informar a todos os interesados nestas bolsas, animándoos a que comecen a recoller toda a documentación que necesitan para que a teñan lista cando abramos a nova convocatoria a comezos do próximo ano», explica o secretario xeral de Emigración, Antonio Rodríguez Miranda.

O Goberno galego destinará a esta iniciativa 2,15 millóns de euros, unha cantidade que permitirá captar a 250 titulados universitarios galegos de currículo brillante, residentes no estranxeiro e que teñan unha titulación de grao, licenciado, enxeñeiro ou arquitecto, que poderán cursar un máster nalgunha das tres universidades galegas.

Os beneficiarios deben ser galegos por nacemento ou descendentes por consanguinidad, acreditar un mínimo de dous anos de residencia no exterior e estar admitidos na preinscrición dalgún dos másteres que ofertan os campus galegos.

O importe da bolsa é de 7.000 ou 7.650 euros, segundo a persoa beneficiaria proceda de Europa ou de calquera outro lugar do mundo, por un curso completo de sesenta créditos ECTS (Sistema Europeo de Transferencia de Créditos). Esta cantidade está destinada a cubrir os gastos de matrícula, viaxe, aloxamento e manutención en Galicia. Os estudantes que se matriculen en cursos de máis duración, 90 créditos, poderán acceder a unha cantidade de entre 10.500 ata 12.000 euros, en función, tamén neste caso, do continente de procedencia do alumno.

Todos os beneficiarios destas axudas disporán tamén de orientación laboral, coa que se pretende non só captar para Galicia os talentos máis brillantes entre os mozos que residen fóra, fomentando o retorno da poboación activa, senón facilitarlles o seu establecemento definitivo na comunidade. Por iso a oferta céntrase en estudos que o tecido produtivo galego teña capacidade de absorber. Trátase, polo tanto, de impulsar o retorno de currículos brillantes e, ao mesmo tempo, de fixar poboación en Galicia. «Ao longo deste tempo comprobamos que hai familias que, a través de calquera medio, coñecen as nosas bolsas e animan aos seus parentes a solicitala para que poidan mellorar a súa formación en Galicia e así apostar por volver poñer en marcha aquí o seu proxecto de vida», di Rodríguez Miranda.

Cando se poña en marcha esta nova convocatoria, o Goberno galego terá ofrecido, entre o 2017 e o 2023, a posibilidade de retornar a 1.400 mozos galegos do exterior no ámbito universitario, incluíndo as equivalentes de Formación Profesional.

A convocatoria para o curso actual pechouse cun 12 % máis de candidatos presentados, 532, fronte aos 470 do ano anterior. As solicitudes chegaron á Secretaría Xeral de Emigración desde 35 países de todos os continentes.

Arxentina foi o lugar desde o que chegaron máis solicitudes, ata 302, seguida do Brasil, Cuba, Uruguai, Venezuela, Reino Unido, México, Alemaña, Portugal e Suíza. Chegaron tamén peticións desde Australia, Aruba, Cabo Verde, Finlandia ou Marrocos.

Adrián Remuiñán, beneficiario dunha bolsa BEME: «Para min foi a oportunidade para volver»

Gústalle ler e estar informado, así que facía xa tempo que Adrián Remuiñán seguíalle a pista ás bolsas BEME. «En pandemia, co sector turístico parado, vin a oportunidade. Xa vira as bolsas BEME e estábamo expondo como oportunidade para volver», di.

O protagonista desta historia naceu na cidade suíza de Xenebra hai 38 anos, de pai galego e nai castelá. Cando el tiña catro anos, a familia regresou e instalouse en Oleiros. Alí creceu Adrián, que á hora de elixir o seu futuro optou por estudar Turismo na Coruña. «Cando acabei funme a Madrid e despois funme a Francia, a Lyon, durante oito anos». Alí estaba, pensando na mellor fórmula para regresar, cando lembrou esas bolsas BEME e decidiu solicitalas. A resposta afirmativa levouno de volta á Universidade da Coruña, onde realizou un máster relacionado co seu campo, o Turismo.

Unha vez concluída a formación e realizadas as prácticas nunha consultoría, o balance non pode ser máis positivo. «Ao finalizar tiven a sorte de entrar a traballar no hotel Praza e estou moi contento», afirma. A bolsa, para el, foi «a oportunidade para volver». «Que che dean un dinerito que che permita estar aquí un tempo está moi ben, porque no meu sector en Galicia non hai tanta rotación de traballos como noutros lugares como Madrid ou Barcelona, e ao final moita xente acábase indo a esas cidades», explica. Agora, xa «instalado no sector», agarda poder asentarse definitivamente en Galicia: «Tiven ata a sorte de coñecer á miña actual parella no máster».