Clases de surf en Valdoviño para refuxiados ucraínos na provincia

(13/02/2023)

Clases de surf en Valdoviño para refuxiados ucraínos na provincia

A voz FERROL

ONDAS NOVAS

Na a escola Ondas Novas

13 feb 2023 .

O surf como unha fórmula de integración e lecer é a proposta que está a facer a escola valdoviñesa Ondas Novas ás persoas que se atopan na provincia como refuxiadas pola guerra de Ucraína. «Na zona de Cariño, Ferrol, A Coruña... hai bastantes familias de acollida e pareceume unha boa forma de darlles a benvida a Galicia. Que mellor forma que poder desconectar e coñecer Galicia co surf», explica Pedro Navarro, á fronte da escola.

E esta semana deuse a oportunidade de organizar a primeira clase. Seis persoas de entre vinte e trinta anos que residen nun centro da zona puideron gozar da experiencia do deporte das ondas. «Para todos foi a primeira vez que surfeaban. Si que estiveran na praia en viaxes turísticas, pero era a primeira vez que probaban este deporte», sinala o instrutor. A xornada, que discorreu nunha praia emblemática deste deporte como é Pantín, foi un bo respiro. «Non tiveran oportunidade de vir a Valdoviño e coñecer estas praias. Sen vehículo propio é complicado chegar a esta zona, que puideron coñecer. Fixen tamén un pouco de embaixador da terra», chancea Pedro. Gustaríalle poder continuar coa iniciativa.