A Secretaría Xeral da Emigración vén de publicar o listado provisional de persoas admitidas e excluídas no programa de Bolsas de Excelencia Mocidade Exterior 2023/24, BEME, pola que se interesaron máis de 600 galegas e galegos universitarios do exterior. Estas bolsas permiten realizar, ás e aos galegos universitarios do exterior menores de 40 anos, un máster nunha das tres universidades galegas. As solicitudes chegaron dende 35 países de tódolos continentes. 

As persoas excluídas disporán dun prazo de prazo de cinco días hábiles contados a partir do día seguinte ao da publicación nesta web, para que acheguen os documentos que se lles requiren. Transcorrido este prazo sen que se achegue dita documentación, considerarase que a persoa interesada desiste da súa petición.

A presentación da documentación que se lle require deberá realizarse de forma electrónica a través da aplicación informática establecida nesta convocatoria de bolsas no apartado de “subsanación”. Mais información  nesta ligazón.

Estas bolsas destínanse a galegas e galegos universitarios residentes fóra de Galicia dende fai máis de dous anos ou descendentes de cidadás e cidadáns galegos con titulación superior que desexen realizar un dos másteres que ofertan a UVigo, a USC e a UDC en calquera dos seus campus.   

O obxectivo destas bolsas é que estas mozas e mozos poidan completar a súa formación universitaria, o que lles podería permitir quedar a traballar e vivir en Galicia. 

A bolsa, cuxo importe vai dos 7.500 aos 12.000 euros (segundo a persoa beneficiaria proceda de Europa ou do resto do mundo e segundo o número de créditos a realizar), destínase a cubrir os gastos de matrícula, viaxe, aloxamento e manutención na Galicia territorial.