(25/09/2009)
No Concello percíbese un incremento dos individuos que proceden doutras grandes cidades
A poboación extracomunitaria e a da UE está formada por 4.536 persoas, e 370 son emigrantes retornados
O censo de poboación inmigrante de Santiago alcanzou este ano as 4.536 persoas procedentes de países extracomunitarios e comunitarios, o que supón un aumento de 18,69% con respecto ao pasado ano. Xa en relación co 2007 rexistrouse un lixeiro incremento de contorna ao 5%. Concretamente no último ano, a capital galega gañou 712 inmigrantes máis. Ademais do volume de poboación inmigrante, a cidade conta con 370 persoas nos seus censo que corresponde a emigrantes retornados que son habitualmente fillos de galegos que emigraron a Latinoamérica.
Algunhas fontes municipais indicaron que o incremento, á marxe dos datos estatísticos, percíbese especialmente nos servizos sociais de base. Apuntaron que se está rexistrando a chegada de inmigrantes procedentes das grandes cidades. As razóns poden ser as de buscar localidades máis pequenas, con máis posibilidades de emprego e nas que hai un menor control policial de cidadáns estranxeiros sen os papeis en regra.
Para facer fronte ás necesidades do colectivo de inmigrantes, o Concello dispón dunha serie de programas específicos para esta poboación, e doutros que, aínda que abertos a todos os cidadáns da capital galega, tamén repercuten nun número importante en persoas deste grupo da poboación.
Dentro dos programas específicos, o departamento de inmigración dispón de plans de acollida e de integración. No primeiro grupo están os de aprendizaxe de lingua e cultura española e galega, que se porán en marcha ao longo do próximo mes. Outro é o de axudas para a manutención e estancia, co obxectivo de atender as necesidades básicas e favorecer a integración.
Nesta liña, o departamento confirmou, aínda que non está cuantificado, un incremento de solicitudes con respecto ao ano pasado cando houbo 14 beneficiados. No apartado de integración, o Concello reforzará as súas liñas de axudas en dous eixos fundamentais, que son o educativo e o dos servizos sociais básicos. No primeiro caso, as axudas están dirixidas ao pago de comedores escolares, actividades extraescolares e material escolar. Neste caso, o incremento de prestacións representa entre un 15% e un 20%.
á marxe das axudas económicas directas, o Concello organiza unha serie de campañas dirixidas á poboación para evitar situacións de intolerancia. Unha destas campañas desenvolverase este curso nos niveis de terceiro e cuarto da ESO e especialmente nos centros cunha maior porcentaxe de poboación inmigrante. Outra das campañas irá dirixida aos alumnos de primaria.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas