A delegada da Xunta no Uruguai, Elvira Domínguez, mantivo unha reunión informativa na sede do departamento autonómico en Montevideo coa ducia de galegas e galegos residentes neste país que participarán a partir do próximo día 15 de xullo no programa Conecta con Galicia que organiza a Secretaría Xeral da Emigración en colaboración coa Dirección Xeral de Xuventude da Consellería de Política Social.
Esta iniciativa, tal e como explicou Elvira Domínguez, ten como obxectivo posibilitar a convivencia en Galicia de 60 mozos e mozas galegas do exterior de entre 16 e 17 anos durante os meses de xullo e agosto. O seu obxectivo é que persoas nadas en Galicia ou descendentes de emigrantes galegas e galegos volvan ter contacto coa realidade galega Desenvolverase no albergue xuvenil de Gandarío en dúas quendas de 30 participantes cada unha: entre o 15 e o 28 de xullo e entre o 29 de xullo e o 11 de agosto, onde realizarán diferentes actividades lúdicas e deportivas, así como participarán en visitas culturais e tamén poderán coñecer empresas punteiras situadas en diversos lugares de Galicia.