A Deputación abre no Barco unha oficina de información a inmigrantes e emigrantes retornados

A cifra de estranxeiros que hai na comarca de Valdeorras (1.972 segundo o censo do 2008) e o alto número de consultas que desde a zona facíanse ao servizo de atención ao inmigrante e emigrante retornado que a Deputación ten en Ourense levaron ao ente provincial a determinar abrir unha oficina destas características no Barco. O servizo foi inaugurado onte na Casa do Ríocigüeño, que será a súa sede todos os xoves (en horario de mañá e tarde).

Un equipo multidisciplinar formado por profesionais do dereito e unha traballadora social encargaranse de resolver as dúbidas «en materia de nacionalidade, visados, permisos de residencia e traballo, homologación de títulos...», enumera Carmen Álvarez. ela e tres compañeiros máis (aínda que circunstancialmente podería unirse algunha outra persoa) se turnarán para desprazarse ao Barco «en función dos temas que se vaian expondo», sinala Enrique Rodríguez. Temas que interesan aos que escolleron vir a Valdeorras procedentes doutras latitudes. Os máis numerosos son os portugueses, con 1.185 en toda a comarca. O Barco é o lugar de destino máis habitual, albergando a 1.264 veciños procedentes de 40 nacionalidades diferentes. A crise tamén fixo que moitos deles acudan ao servizo para pedir información sobre como cobrar o paro de volta nos seus países de orixe.

Pero a oficina tamén contesta ás preguntas dos que queren regresar á terra logo de anos, ás veces moitos, na inmigración. «Hai xente que vivía en Alemaña ou Suíza e queren volver para pasar os seus últimos anos; aínda que a maioría son segundas e terceiras xeracións, que agora queren solicitar a nacionalidade a través da memoria histórica. Moitas veces non é para eles, senón para abrirlles as portas aos seus fillos», conta Álvarez. Neste labor, o servizo traballa como intermediario á hora de explicar os trámites a seguir, e as peticións ao rexistro civil (ou aos curas, segundo o caso) para conseguir os datos necesarios.