Santiago, capital do cine árabe con 36 filmes en competición
(05/10/2009)
Santiago, capital do cine árabe con 36 filmes en competición
03.10.2009 36 cintas compiten na sección oficial ·· Os títulos profundan en cuestións como o conflito palestino-israelí, o papel da muller ou a inmigración ·· O festival celebrarase entre 23 e o 31 de outubro
|
REDAC./AGN. SANTIAGO
O Festival Internacional de Cine Euro-Árabe Amal tende por sétimo ano consecutivo unha ponte cinematográfica entre Galicia e o mundo árabe. Esta edición, que coincide co 25 aniversario da Fundación Araguaney-Ponte de Culturas, celebrarase do 23 ao 31 de outubro. Conta cun orzamento que rolda os 300.000 euros.
O programa inclúe a proxección de 36 películas en competición. As cintas profundan na complexa realidade dos países árabes, desde a ficción ao documental, en formato de longo e curtametraxe. O conflito palestino-israelí, o papel da muller no mundo árabe e a inmigración serán algúns dos temas recorrentes nestes traballos. Na presentación do festival, celebrada onte en Compostela, o director de Amal, Ghaleb Jaber Martínez, destacou o carácter de "ponte" entre diferentes culturas do certame. De feito, adiantou que o próximo ano engadirase tamén o cine latinoamericano. No tocante ás películas a concurso, Jaber sinalou que o recente conflito en Gaza estivo moi presente no traballo de moitos directores, que chegaron a pedir que se aumentase o prazo de entrega polo bloque israelí. O director mostrouse emocionado porque moitos deles "arriscaron a vida" para mandar os seus traballos.
"Espírito de tolerancia"
Neste sentido, un dos membros do xurado, Eduardo Galán, asegurou que é "o mellor ano en canto á calidade media, que é de notable alto". Así, subliñou que "tres ou catro películas serán difíciles de esquecer".
En canto ás temáticas, Galán sinalou que se trata dun cine "moi social" e "virulentamente comprometido, pero non violento". Deste xeito, engadiu que estamos ante a selección con maior "espírito de tolerancia e entendemento" dos últimos anos e que case o 50 por cento das cintas están dirixidas por mulleres, que tamén son protagonistas de boa parte destas producións. Así mesmo, puntualizou que "a procura de identidade está presente en moitos títulos".