A inmigración mantén alta a incidencia da tuberculose en España

(13/10/2009)

A inmigración mantén alta a incidencia da tuberculose en España
Os nenos adoptados non veñen con severas patoloxías físicas, senón afectivas



Oviedo, P. R.
A alta taxa de inmigración, procedente na súa maioría de países de Sudamérica, África ou o leste de Europa, mantén elevada a incidencia da tuberculose en España, país que, xunto a Portugal, é o que máis casos rexistra de toda Europa: 18 por 100.000 habitantes, segundo o Centro Nacional de Epidemiología, e 25/30 por 100.000, segundo a OMS. A poboación inmigrante representa entre o 30 e o 45 por cento dos casos.

Enfermidade de diagnóstico complexo e cun tratamento moi efectivo, o xeito máis eficaz de abordala é cun exame de saúde que inclúa a proba de tuberculina, afirmou onte María José Mellado, presidenta da Sociedade Española de Infectología Pediátrica, no marco do Congreso nacional de pediatría que se clausurou onte en Oviedo.

Os fillos de inmigrantes de países con alta prevalencia de tuberculose son tamén máis vulnerables, polo que as posibilidades de infección son maiores, destacou Santiago Alfayate Miguélez, da sección de enfermidades infecciosas pediátricas do Hospital Universitario Virxe da Arrixaca (Murcia).

Estímase que un terzo da poboación mundial está infectada por tuberculose, con aproximadamente 9 millóns de casos novos anuais. As mortes que causa están entre 1,5 e 2 millóns ao ano. En España, por comunidades autónomas, Ceuta, Melilla e Galicia rexistran as cifras máis altas.

Case 38.000 nenos procedentes de países estranxeiros foron adoptados en España entre os anos 1997 e 2007, segundo datos oficiais. A maioría non presenta patoloxías físicas severas, aínda que si problemas de adaptación. Jesús García Pérez, asturiano de Sotrondio e médico da unidade pediátrica social do Hospital Neno Jesús de Madrid, sinalou onte que os desaxustes máis frecuentes están relacionados cun atraso leve no desenvolvemento de peso e talla, a anemia, problemas dermatológicos banais e problemas de alimentación ou soño.

Tan só un 2 por cento adoita presentar problemas de maior gravidade, tanto físicos como psíquicos. «Os nenos veñen cunha maleta, pero tamén cunha mochila. Habitualmente son nenos abandonados, que proceden de orfanatos, algúns pasaron xa por cinco ou seis familias antes de chegar a España, veñen cunha bagaxe importante que é necesario valorar», sinalou.

Cando o neno chega a España, os pediatras recomendan deixarlle uns días de adaptación antes de levalo ao pediatra, agás se presenta signos dalgunha enfermidade aguda. Tamén se aconsella non apresurar a súa escolarización «porque moitos nenos cren que o colexio é outro orfanato e se se lles leva demasiado pronto poden xurdir problemas de conduta, emocionais ou de incontinencia. «Hai que ir aos poucos, facendo que ese apego sexa o máis lento posible», afirmou.