O secretario xeral da Emigración, Santiago Camba, conmemorou o Día da Hispanidade xunto á colectividade na Hermandad Gallega de Venezuela, en Caracas,que actualmente asocia a uns 10.000 galegos. Na que foi a súa primeira visita institucional ao colectivo de Venezuela, Camba destacou o valor da diáspora na «incalculable contribución a Galicia e a construir un mundo mellor». «É momento de que aqueles que desexen voltar poidan facelo nas mellores condicións e coa mesma amplitude de dereitos que os galegos que viven en Galicia», asegurou.

O responsable de Emigración garantizou o deseño dun conxunto de medidas estratéxicas destinadas a aqueles que desexen voltar, coa finalidade última de que poidan exercer os seus dereitos en igualdade de condicións e coa mesma amplitude que os galegos que viven no ámbito territorial da Comunidade Autónoma. Venezuela é o principal país de retorno dentro de todo o territorio autonómico, superando á Arxentina.

Segundo datos do Instituto Nacional de Estatística, un total de 831 galegos retornaron de Venezuela. Galicia é a terceira comunidade autónoma de España, despois de Madrid e Cataluña, que recibe máis españois procedentes do estranxeiro.

Isto indica a importancia do movemento migratorio de retorno a Galicia, que pasou de ser un país de emigración no pasado a ser un país de retorno nestes últimos anos, máis propiamente que de inmigración, en comparanza coa totalidade de España.

Competencias

O director xeral de Emigración apuntou dende terras venezolanas que «detectou importantes carencias socioasistenciais -fundamentalmente no colectivo de Caracas- nunha atención que é competencia central, «tendo que chegar a Xunta onde o goberno de España non chega». «As autonomías temos posto fronte á atención aos emigrantes porque nos últimos anos o goberno non soubo xestionar», indicou Camba.